BODI YA REA YAMPA SIKU 21 MKANDARASI KUSIMIKA NGUZO

Kamati ya Ufundi ya Bodi ya Wakurugenzi wa Wakala wa Nishati Vijijini (REB), imetoa muda wa siku 21 kwa Mkandarasi NIPO Group anayetekeleza miradi ya umeme vijijini mkoani Mwanza, kufanya kazi zote zilizokuwa zimesimama, ikiwemo usimikaji wa nguzo takribani 1,800.

Akizungumza na waandishi wa habari baada ya kikao kazi baina ya Bodi hiyo na Mkandarasi, Oktoba 7, 2019 jijini Mwanza, Mwenyekiti wake, Mhandisi Styden Rwebangira alisema, pia wamempa Mkandarasi husika siku saba kuwasilisha mpango kazi unaoainisha namna atakavyotekeleza kazi ya usambazaji umeme katika eneo lake lote na kukamilisha ifikapo mwishoni mwa Desemba mwaka huu, kama ilivyoagizwa na Waziri wa Nishati, Dkt. Medard Kalemani.

Mwenyekiti wa Kamati ya Ufundi ya Bodi ya Wakurugenzi wa Wakala wa Nishati Vijijini (REB), Mhandisi Styden Rwebangira (wa pili-kulia) na baadhi ya wajumbe wa Kamati hiyo, wakimsikiliza Mkandarasi NIPO Group (hayupo pichani) anayetekeleza miradi ya umeme vijijini mkoani Mwanza, walipokuwa kwenye ziara kukagua utekelezaji wa miradi hiyo, Oktoba 7, 2019.

Mhandisi Rwebangila alisema, Bodi imelazimika kutoa maagizo hayo baada ya kufanya ziara ya siku mbili mkoani humo na kubaini kuwa katika maeneo mengi kazi zimesimama huku kukiwa hakuna vibarua wa mkandarasi kwenye maeneo ya kazi.

Hata hivyo, alisema kuwa changamoto za Mkandarasi huyo ni ndogo ambazo zinaweza kutatuliwa kwa urahisi na kwamba endapo atafuata maelekezo aliyopatiwa na Bodi, ataweza kukamilisha kazi kwa wakati.

Baadhi ya Wajumbe wa Bodi ya Wakurugenzi wa Wakala wa Nishati Vijijini (REB), wakiwa ofisini kwa Mkuu wa Mkoa wa Mwanza, John Mongela (katikati), walipomtembelea wakiwa katika ziara ya kazi kukagua utekelezaji wa miradi ya umeme vijijini, Oktoba 7, 2019

“Alianza kwa kasi nzuri lakini hapa katikati akasimama. Tumemhoji na amekiri kuwa kazi zimesimama kwa kuwa alikuwa na changamoto ya fedha iliyosababisha acheleweshe malipo ya vibarua wake kwa takribani miezi mitatu; lakini ametuhakikishia kuwa amekwishatatua changamoto hiyo na kwamba vibarua watarejea kazini ndani ya wiki hii katika maeneo yote.”

Alisema, Bodi itarudi kumkagua Mkandarasi huyo endapo ametekeleza maagizo yake baada ya siku 21 na kwamba endapo atashindwa kutekeleza, hatua za kimkataba zitachukuliwa dhidi yake ikiwa ni pamoja na kusitisha mkataba wake na kumwondolea sifa za kupewa kazi nyingine za aina hiyo na serikali.

Kaimu Mkurugenzi wa Huduma za Ufundi kutoka Wakala wa Nishati Vijijini (REA), Mhandisi Jones Olotu (aliyesimama), akizungumza wakati wa kikao kazi baina ya Wakurugenzi wa Bodi ya Wakala huo (walioketi meza kuu) pamoja na Mkandarasi anayetekeleza miradi ya umeme vijijini mkoani Mwanza, Oktoba 7, 2019.

Akizungumzia zaidi changamoto za kiutawala na kiusimamizi katika kampuni kadhaa za wakandarasi, Mhandisi Rwebangila alisema Bodi imebaini tatizo hilo katika kampuni nyingi ambazo zimeungana ili kufanya kazi pamoja.

Akifafanua, alisema, kampuni hizo zinapoomba kazi zinapewa kwani zinakuwa zimejieleza kuwa zinaunganisha nguvu ili kutekeleza kazi kwa ufanisi zaidi lakini baada ya kupewa kazi, zinatengana na kugawana kazi hivyo kupunguza ufanisi.

Mkandarasi anayetekeleza miradi ya umeme vijijini, Mkoa wa Mwanza, Wilson Chilewa kutoka kampuni ya NIPO Group, akizungumza wakati wa kikao kazi baina ya baadhi ya wajumbe wa Bodi ya Wakurugenzi wa Wakala wa Nishati Vijijini (REB) (hawapo pichani) na kampuni hiyo, Oktoba 7, 2019

Alisema, kufuatia hali hiyo, Bodi imekuwa ikizishauri kampuni zilizoungana kuhakikisha hazigawani kazi bali zinatakiwa kutekeleza kwa pamoja ili kuwa na ufanisi.

Aidha, alisema kuwa, maagizo yaliyotolewa na Bodi kwa Mkandarasi yanahusu pia Mkoa wa Arusha ambao ni eneo lingine analotekeleza kazi.

Kamati ya Ufundi ya Bodi ya Wakurugenzi wa Wakala wa Nishati Vijijini (REB), wakiwa kwenye kikao na Mkandarasi NIPO Group anayetekeleza miradi ya umeme vijijini mkoani Mwanza, wakati Bodi hiyo ilipokuwa kwenye ziara kukagua utekelezaji wa miradi ya umeme vijijini, Oktoba 7, 2019

Kamati ya Ufundi ya Bodi ya Wakurugenzi wa Wakala wa Nishati Vijijini (REB), ikikagua maendeleo ya utekelezaji wa miradi ya umeme vijijini wilayani Misungwi, Mkoa wa Mwanza, Oktoba 5, 2019

Kwa upande wake, Mkandarasi husika, aliahidi kuwa amejipanga kutekeleza yale yote aliyoagizwa na Bodi, na kwamba atakamilisha kazi husika kwa wakati kama ilivyoelekezwa na serikali.

Akizungumzia mpango wa serikali katika utekelezaji wa miradi ya umeme vijijini, Kaimu Mkurugenzi wa Huduma za Ufundi kutoka REA, Mhandisi Jones Olotu, alisema ifikapo Januari 2020, Mzunguko wa Pili wa Mradi wa Umeme Vijijini Awamu ya Kwanza, unatarajiwa kuanza.

Alisema katika Mzunguko huo wa Pili, vijiji vyote Tanzania Bara vitafikiwa na nishati ya umeme.Na Veronica Simba – Mwanza