RAIS DKT. MAGUFULI AFUNGUA BARABARA YA KANAZI-KIZI-KIBAONI KM 76.6, DARAJA LA KAVUU MITA 85.3 PIA AHUTUBIA WANANCHI WA KIBAONI MKOANI KATAVI

Rais wa Jamhuri ya Muungano wa Tanzania Mheshimiwa Dkt. John Pombe Magufuli akifungua barabara ya Kanazi-Kizi-Kibaoni km 76.6 iliyokamilika kujengwa kwa kiwango cha lami pamoja na Daraja la Kavuu M 85.3 katika sherehe zilizofanyika katika eneo la Kibaoni mkoani Katavi.

 

Rais Dkt. John Magufuli leo tarehe 09 Oktoba, 2019 ameendelea na ziara yake katika Mkoa wa Katavi ambapo amefungua barabara ya lami ya Kanazi – Kizi – Kibaoni yenye urefu wa kilometa 76.6 na daraja la Kavuu (lenye urefu wa meta 85.3 na upana wa meta 4.6) lililopo katika barabara ya Majimoto – Inyonga.

Ujenzi wa barabara ya Kanazi – Kizi – Kibaoni ambao ni sehemu ya barabara kuu ya Sumbawanga – Namanyere – Mpanda yenye urefu wa kilometa 245 umegharimu shilingi Bilioni 102.364, fedha zote zimetolewa na Serikali ya Tanzania.

Rais wa Jamhuri ya Muungano wa Tanzania Mheshimiwa Dkt. John Pombe Magufuli akiwasalimia wananchi wa Kibaoni mkoani Katavi mara baada ya kuwasili wakati akitokea wilaya ya Nkasi mkoani Rukwa.

 

Ujenzi wa daraja la Kavuu ambalo linaunganisha Makao Makuu ya Halmashauri ya Wilaya ya Mpimbwe na Wilaya ya Mlele Mkoani Rukwa, umegharimu shilingi Bilioni 3.6, fedha zote zimetolewa na Serikali ya Tanzania.

Akizungumza na wananchi katika mkutano wa hadhara uliofanyika Kibaoni Wilayani Mlele, Mhe. Rais Magufuli amewapongeza wananchi wa Mkoa wa Katavi kwa juhudi kubwa katika uzalishaji wa mazao ya chakula na amewaahidi kuwa Serikali itaendelea kuboresha miundombinu ya barabara na madaraja na kuimarisha zaidi huduma za kijamii ikiwemo kusambaza zaidi umeme na maji.

Sehemu ya barabara ya Kanazi-Kizi-Kibaoni km 76.6 iliyokamila kujengwa kwa lami na kufunguliwa na Rais wa Jamhuri ya Muungano wa Tanzania Mheshimiwa Dkt. John Pombe Magufuli kama inavyoonekana pichani.

Rais wa Jamhuri ya Muungano wa Tanzania Mheshimiwa Dkt. John Pombe Magufuli akiwahutubia wananchi wa Kibaoni mkoani Katavi mara baada ya kufungua barabara ya Kanazi-Kizi-Kibaoni km 76.6 iliyokamila kujengwa kwa lami pamoja na Daraja la Kavuu M 85.3

 

Rais Magufuli ameiagiza Wizara ya Ujenzi, Uchukuzi na Mawasiliano kuanza maandalizi ya ujenzi wa barabara ya Kibaoni – Sitalike yenye urefu wa kilometa 71 ambayo ni kipande kilichobaki kuunganisha Mkoa wa Rukwa na Katavi kupitia Hifadhi ya Taifa ya Katavi.

Amefafanua kuwa Serikali imedhamiria kuhakikisha barabara kuu kwa kiwango cha lami kutoka Mpanda – Uvinza – Nyakanazi unakamilika ili ukanda wa nyanda za juu kusini unaoiunganisha Tanzania na nchi za Zambia, Malawi hadi Afrika Kusini uunganishwe na ukanda wa magharibi unaounganisha Tanzania na nchi za Burundi, Rwanda, Jamhuri ya Kidemokrasia ya Kongo na Uganda.

Rais wa Jamhuri ya Muungano wa Tanzania Mheshimiwa Dkt. John Pombe Magufuli akizungumza na wananchi wa Kizi mkoani Rukwa wakati akielekea Kibaoni mkoani Katavi.

 

Kuhusu migogoro ya ardhi, Mhe. Rais Magufuli amesema Serikali imeamua vijiji 920 kati ya 975 hapa nchini vilivyopo katika maeneo ya hifadhi kutoondolewa katika maeneo hayo, kufuta mapori ya akiba 12 (yenye jumla ya ekari 707,659.95) na Misitu 7 (yenye jumla ya ekari 46,715) na kumega maeneo katika hifadhi 14 ili kuwawezesha wananchi kupata maeneo ya kuishi, kilimo na ufugaji na kwamba katika uamuzi huo vijiji 60 vilivyonufaika ni vya Mkoa wa Katavi.

Waziri wa Ardhi, Nyumba na Maendeleo ya Makazi, Mhe. William Lukuvi amefafanua kuwa pamoja na hatua hiyo, wataalamu wa ardhi watapita katika vijiji hivyo ili kutoa elimu ya matumizi bora ya ardhi ili kuepusha migogoro inayoweza kujitokeza baina ya wananchi.

Rais wa Jamhuri ya Muungano wa Tanzania Mheshimiwa Dkt. John Pombe Magufuli akizungumza na wananchi wa Mulele wakati akielekea kufungua barabara ya Kanazi-Kizi-Kibaoni km 76.6

 

Hata hivyo, Mhe. Rais Magufuli ameonya kuwa baada ya Serikali kuchukua uamuzi huo, haitarajii kuona wananchi wanaendelea kuvamia maeneo ya hifadhi na amewataka wananchi wa Katavi kutumia maeneo hayo kuzalisha zaidi mazao mbalimbali ili kujiongezea kipato.

Akiwa njiani kutoka Namanyere katika Wilaya ya Nkasi Mkoani Rukwa kuelekea Mpanda Mkoani Katavi, Mhe. Rais Magufuli amesalimiana na wananchi wa Kizi (Nkasi) na Mirumba (Mlele) na baadaye amesalimiana na wananchi wa Sitalike Wilayani Mpanda ambapo amewahakikishia kuwa vitongoji vya Igalukilo, Kabenga, Kaloleni na Situbwike havitaondolewa katika maeneo ya hifadhi kufuatia uamuzi wa Serikali wa kuvirasimisha vitongoji hivyo.

Rais wa Jamhuri ya Muungano wa Tanzania Mheshimiwa Dkt. John Pombe Magufuli akiangalia wanyama aina ya viboko katika hifadhi ya Taifa ya Katavi mara baada ya kusimama wakati akielekea Mpanda.

 

Wakati huo huo, Mhe. Rais Magufuli ametembelea Hifadhi ya Taifa ya Katavi na kisha kuzungumza na Maafisa na Askari Wanyamapori wa Shirika la Hifadhi za Taifa (TANAPA) ambapo amewapongeza kwa kazi nzuri ya kuhifadhi wanyamapori ikiwemo kukabiliana na ujangili hali iliyowezesha kuongezeka kwa idadi ya wanyama wakiwemo wale waliokuwa hatarini kutoweka.

Mhe. Rais Magufuli amemtaka Kamishna wa Uhifadhi wa TANAPA Dkt. Allan Kijazi kuchimba mabwawa ya kuvuna maji mengi zaidi ya mvua yatakayowasaidia wanyama hasa viboko wakati wa kiangazi kikali pamoja na kujipanga kuzuia wanyama wakali wanaoweza kuvamia makazi ya watu na kuhatarisha maisha ya wananchi.

Rais wa Jamhuri ya Muungano wa Tanzania Mheshimiwa Dkt. John Pombe Magufuli akizungumza na Wananchi wa Nsimbo mkoani Katavi mara baada ya kuwasili akitokea Kibaoni.

 

Kesho tarehe 10 Oktoba, 2019 Mhe. Rais Magufuli ambaye ameongozana na Mkewe Mama Janeth Magufuli ataendelea na ziara yake hapa Mkoani Katavi ambapo atazindua Kituo cha Mabasi cha Mkoa wa Katavi, ataweka jiwe la msingi la ujenzi wa barabara ya Mpanda – Tabora, atafungua barabara ya Mpanda – Sitalike na kuhutubia mkutano wa hadhara katika uwanja wa Azimio Mjini Mpanda.

PICHA NA IKULU