CORONA ISIWE KISINGIZIO CHA KUKWAMISHA MIRADI YA UMEME - WAZIRI KALEMANI

Waziri wa Nishati Dkt Medard Kalemani na Ujumbe wake, wakikagua maendeleo ya ujenzi unaolenga kupanua Kituo cha kupoza umeme cha Singida, akiwa katika ziara ya kazi Aprili 18, 2020.

Veronica Simba – Singida

Waziri wa Nishati Dkt Medard Kalemani amekagua utekelezaji wa miradi mbalimbali ya umeme mkoani Singida huku akitahadharisha kuwa uwepo wa janga la Corona (COVID 19) nchini usitumike kama kisingizio cha kukwamisha miradi hiyo. 

Akizungumza kwa nyakati tofauti akiwa katika ziara hiyo, Aprili 18 mwaka huu, Dkt Kalemani alisisitiza kuwa ni lazima watekelezaji wa miradi husika kufuata maelekezo ya Rais John Magufuli na wataalamu wa afya katika kujikinga na Corona lakini ni lazima pia kuendelea na kazi.

“Corona ipo, ni lazima tuchukue tahadhari zote za kujikinga kama tunavyoelekezwa lakini kwa upande mwingine maisha inabidi yaendelee hivyo tunawajibika kuendelea kufanya kazi.”

 

Mafundi wakiendelea na kazi za ujenzi wa kituo cha kupoza umeme Singida. Taswira hii ilichukuliwa wakati wa ziara ya Waziri wa Nishati Dkt Medard Kalemani (hayupo pichani), Aprili 18, 2020.

Akieleza kwa kina dhamira ya ziara yake, Dkt Kalemani alisema yeyé pamoja na viongozi wenzake wa sekta ya nishati, wanalazimika kufanya ziara hizo ili kuhakikisha wakandarasi na wasimamizi wa miradi husika hawabweteki na kutelekeza kazi hususan katika kipindi hiki cha janga la Corona.

Akifafanua zaidi, alisema hakuna anayejua janga hilo litaisha lini hivyo ni lazima kuendeleza mapambano kwa kufanya kazi maana Watanzania wangali wanahitaji umeme.

Hata hivyo, Waziri Kalemani alikagua miradi husika kwa utaratibu tofauti na uliozoeleka ambapo haukuhusisha mikusanyiko ya wananchi badala yake walioshiriki ni viongozi pekee wa ngazi za wilaya, kata, vijiji na vitongoji.

Aliwataka wananchi kubaki majumbani na kwamba watapata maelekezo ya Serikali kupitia kwa viongozi wao na katika vyombo vya habari.

 

Waziri wa Nishati Dkt Medard Kalemani (wa tatu kutoka kulia), akikata utepe kabla ya kuwasha rasmi umeme katika Zahanati ya Mutare, wilayani Ikungi, Mkoa wa Singida akiwa katika ziara ya kazi, Aprili 18 mwaka huu. Kushoto kwake ni Mkuu wa Wilaya ya Ikungi, Edward Mpogolo na kulia kwa Waziri ni Mbunge wa Singida Mashariki, Miraji Mtaturu.

“Nilitoa maelekezo kuwa katika kipindi hiki cha janga la Corona, ziara zetu zitahusisha viongozi peke yake ili kuepusha mikusanyiko ya watu, ikiwa ni utekelezaji wa maelekezo tuliyopatiwa na wataalamu wa afya katika kujikinga na ugonjwa huu.

Katika ziara hiyo, Waziri aliagiza kusakwa na kukamatwa Mkandarasi Emmanuel Nyigwa, anayedaiwa kuchukua pesa za wananchi kwa makubaliano ya kufanya kazi ya kusuka mfumo wa nyaya za umeme (wiring) katika nyumba zao lakini akatoweka pasipo kufanya kazi hiyo. 

Aidha, kufuatia malalamiko hayo yaliyowasilishwa kwake na Mbunge wa Singida Mashariki, Miraji Mtaturu, Waziri alitoa maelekezo kwa mameneja wote wa Shirika la Umeme Tanzania (TANESCO) nchi nzima, kuchukua dhamana ya kuwasajili kwa kuwagongea muhuri wakandarasi wanaofaa kufanya kazi ya kusuka mfumo wa nyaya katika majengo ili kuwaepusha wananchi na adha kama hiyo iliyotokea.

Alisema uthibitisho huo wa Meneja husika utamaanisha kuwa taarifa zote za Mkandarasi ikiwemo namba zake za simu na mahali anakoishi zinafahamika na kurekodiwa ili kuwa na uhakika wa kumpata pindi anapokiuka makubaliano.

Katika hatua nyingine, Waziri alikagua kazi inayoendelea ya upanuzi wa Kituo cha kufua umeme cha Singida, ambayo ni sehemu ya utekelezaji wa Mradi mkubwa wa umeme ujulikanao kama Backbone Transmission Investment Project (BTIP) Awamu ya Pili. 

Aliagiza kazi hiyo ikamilike ifikapo Julai mwaka huu kama yalivyo makubaliano na kusisitiza kwamba kamwe Serikali haitaongeza muda kwakuwa ilikwishafanya hivyo awali.

Waziri pia aliwasha umeme katika maeneo mbalimbali ikiwemo vituo vya afya, sehemu za biashara na makazi ya wananchi katika vijiji vya Nkuhi, Muungano, Matare na Mghamo katika Wilaya za Ikungi na Singida Vijijini.

Wakizungumza kwa nyakati tofauti, viongozi mbalimbali akiwemo Mkuu wa Wilaya ya Ikungi Edward Mpogolo, Mbunge wa Singida Mashariki Miraji Mtaturu na Mbunge wa Singida Kaskazini Justin Nonko, walipongeza jitihada zinazofanywa na Serikali ya Awamu ya Tano kupitia Wizara ya Nishati, katika kuwapelekea wananchi huduma ya umeme hususan vijijini.

Waziri anatarajiwa kuhitimisha ziara yake mkoani humo, Aprili 20, mwaka huu.