UDOM KUZALISHA VITAKASA MIKONO NA BARAKOA

Mkuu wa Mkoa wa Dodoma Dk Binilith Mahenge akisikiliza maelezo kutoka Mganga Mkuu wa Hospitali ya UDOM Dk Alex Ernest wakati wa ziara yake hospitalini hapo akiwa pamoja na kamati ya ulinzi na usalama ya mkoa na wataalam wa afya mkoa.

Chuo Kikuu cha Dodoma(UDOM ) kupitia wataalamu wake, kimeanza kutengeneza Barakoa  na Vitakasa mikono kwa lengo la kuongeza nguvu na mchango wa Chuo hiko katika kusaidia kupambana na maambukizi ya Virusi vya Homa kali ya mapafu (COVID 19) hapa nchini.

Majengo ya Hospitali ya Chuo Kikuu cha Dodoma(UDOM)iliyoteuliwa kupokea wa Corona

Makamu Mkuu wa Chuo hicho Profesa Faustine Bee  amemwambia Mkuu wa Mkoa wa Dodoma Dkt. Binilith Mahenge aliyeambatana na Kamati ya Ulinzi na Usalama ya Mkoa wa Dodoma kuwa, Chuo hicho kitaanza kusambaza vifaa hivyo kwa wingi na kwa gharama nafuu ambayo watu na Taasisi wataimudu.

"Kama chuo tumeona tusaidie katika mapambano haya,tutazalisha barakoa na vitakasa mikono kwa bei nafuu,"alisema Mkuu huyo.

Mkuu wa Mkoa wa Dodoma Dk Binilith Mahenge akiwasili hospitali ya UDOM akiwa katika ziara na kamati ya ulinzi na usalama ya mkoa na wataalam wa afya mkoa.

Katika hatua nyingine Uongozi wa Serikali ya Mkoa wa Dodoma kwa kushirikiana na Uongozi wa UDOM umeiteua hospitali ya Chuo Kikuu cha Dodoma kuanza kutumika kutoa huduma za matibabu kwa Wagonjwa wa Corona.

Kamati ya Ulinzi na Usalama ya Mkoa chini ya Mwenyekiti wake Mkuu wa Mkoa wa Dodoma Dkt Mahenge kwa kushirikiana na Timu ya wataalamu wa Afya wa Mkoa wa Dodoma na uongozi wa UDOM umefanya ziara ya kukagua hospitali ya Chuo hicho na kujiridhisha kuwa itasaidia kuboresha na kuimarisha utoaji huduma kwa wagonjwa watakaothibitika kuugua Corona.

Mkuu wa mkoa wa Dodoma Dk Binilith Mahenge akipokea maelezo ya moja wa wodi iliyopo Hospitali ya UDOM kutoka kwa Mganga Mkuu wa Hospitali hiyo Dk Alex Ernest.

Hospitali hiyo inafanya idadi ya hospitali za kutolea matibabu ya Corona kwenye Wilaya ya Dodoma kuwa mbili ikiwemo  Kituo cha Afya Mkonze.