GEKUL AWAONYA WASANII KUACHA KUTANGAZA MAMBO YAO BINAFSI MITANDAONI

 

Na Grace Semfuko, MAELEZO

Naibu Waziri wa Habari, Utamaduni,Sanaa na Michezo Mhe. Pauline Gekul amewataka Wasanii Nchini kuacha kutangaza mitandaoni mambo yao binafsi na badala yake watangaze kazi zao ili kuleta tija ya maendeleo yao kiuchumi.

Pia amewataka Wazazi wa Wasanii kulinda hadhi za Watoto wao kwa kutowahusisha kwenye migogoro yao ya mahusiano pindi Baba na Mama wanaporafakakana kwani wanawaingiza kwenye historia isiyofaa katika maadili ya Kitanzania.

Ameyasema hayo katika ziara yake kwenye Ofisi za Baraza la Sanaa la Taifa-BASATA na kulitaka Baraza hilo kuwa na kanuni imara za kuimarisha maadili na mienendo ya wasanii Nchini.

“Kama kuna kitu Watanzania haturidhishwi nacho ni kitendo cha msanii kuelezea maisha yake binafsi, kwamba nimezaa na huyu, nina Wanawake kadhaa, hii inadidimiza utamaduni wetu, mnatuharibia kizazi hiki ambacho kinakua kuona kwamba ni fasheni kueleza mahusiano kwenye mitandao, mahusiano ni ya mtu binafsi, na je Wasanii wetu ni lazima wafanye mwingiliano? Kwamba mimi ni msanii lazima nitembee na wewe, na wewe na wewe!” amehoji Gekul.

Aidha amesema ni muhimu sheria na kanuni za maadili ya Wasanii zikaongezewa nguvu ili kuhakikisha wanaondokana na vitendo hivyo ambavyo amevitaja kuwa vinashusha hadhi ya Wasanii nchini.

“Hivi hakuna sheria inayowabana, si ipo? Au adhabu na fine zimekuwa ndigo sana? Tunasimamia kwa kiasi gani hizo kanuni? Hili jambo lazima liwe makini sana, wengi hawafurahishwi, tunatamani tuwafahamu Wasanii kwa mambo mazuri ya kujenga jamii zetu, lakini sio kwa mambo yake binafsi, kila mtanzania akiweka mambo yake binafsi hiyo mitandao ingekwama tu, yaani maisha yako binafsi ni sehemu ya sisi kufahamu? Ili tukupe kiki?” amesema Gekul.

Kuhusu Wazazi wa Wasanii kuingiza Vijana wao kwenye migogoro ya mahusiano ya kifamilia, Gekul amesema ni muhimu Mzazi kulinda hadhi na maslahi ya mtoto wako kwa kumuondolea historia isiyofaa kwa jamii inayomzunguka na kwamba ni muhimu kuzingatia maadili ya kitanzania.

“Mama unaanza kusema mtoto wangu baba yake sio huyu ni yule! unamjengea mazingira gani huyu Mtoto? Hebu tuongeeni kama watanzania, miongoni mwetu tumezaliwa kwenye mazingira ya kitanzania, wengine huenda tumezaliwa kwenye mazingira ya Baba na Mama wametulea lakini huyo Baba sio wako na hujawahi kujua kama sio Baba yako mzazi, Wazazi wetu walivyotukuza, walivyotulea sicho tunachokiona kwa sasa, yaani mtoto anakuwa mjadala wa siku kwenye mitandao? Kwa nini? Mtoto ni zawadi kutoka kwa Mungu, ni Malaika, lakini sasa unamleta kwenye mitandao tunamjadili, ili iweje?” alihoji Gekul.

Naibu Waziri wa Habari, Utamaduni, Sanaa na Michezo, Mhe.Pauline Gekul